Հնդկաստանի ԱԳՆ-ն հայտարարություն է տարածել՝ պատասխանելով ԱՄՆ նախագահ Դոնալդ Թրամփի գրառմանը։
«Հնդկաստանը ներմուծում է ռուսական նավթ, քանի որ Ուկրաինայի հակամարտության պատճառով ավանդական մատակարարումները շեղվել են դեպի Եվրոպա: ԱՄՆ-ն ինքն է խրախուսել Հնդկաստանին ներմուծել նավթ՝ համաշխարհային էներգետիկ շուկաները կայունացնելու համար։
Հնդկաստանին անհրաժեշտ է ներմուծում՝ իր սպառողների համար էներգիայի կանխատեսելի և մատչելի գներ ապահովելու համար: Միևնույն ժամանակ, Հնդկաստանին քննադատող երկրներն իրենք են առևտուր անում Ռուսաստանի հետ։
Եվրամիությունը 2024 թվականին Ռուսաստանի հետ երկկողմ առևտուր է ունեցել 67.5 միլիարդ եվրոյի (ապրանքներ) և 17.2 միլիարդ եվրոյի (ծառայություններ) արժողությամբ: Ռուսաստանից ԵՄ հեղուկացված բնական գազի ներմուծումը հասել է ռեկորդային 16.5 միլիոն տոննայի։
Եվրոպայի առևտուրը Ռուսաստանի հետ ներառում է ոչ միայն էներգիա, այլև պարարտանյութեր, հանքարդյունաբերական արտադրանք, քիմիական նյութեր, երկաթ, պողպատ և մեքենաներ։
ԱՄՆ-ն շարունակում է Ռուսաստանից ներմուծել ուրանի հեքսաֆտորիդ իր միջուկային արդյունաբերության համար, պալադիում էլեկտրական տրանսպորտային միջոցների համար, պարարտանյութեր և քիմիական նյութեր։
Այս համատեքստում Հնդկաստանի հասցեին քննադատությունը անարդար և անհիմն է: Հնդկաստանը կձեռնարկի բոլոր անհրաժեշտ միջոցները՝ իր ազգային շահերը և տնտեսական անվտանգությունը պաշտպանելու համար»,- ասված է հայտարարության մեջ։
Ավելի վաղ ԱՄՆ նախագահ Դոնալդ Թրամփը հայտարարել էր, որ մտադիր է «էապես բարձրացնել» Հնդկաստանի ներմուծման մաքսատուրքերը, քանի որ Հնդկաստանը նավթ է գնում Ռուսաստանից։
