Միջազգային
Ռուսաստանի ազդեցության 29 վայրերում խոշտանգում են ուկրաինացիներին․ The Guardian
Ռուսաստանի իշխանությունները ստեղծել են առնվազն 29 բանտերից բաղկացած ցանց, որտեղ Ուկրաինայի քաղաքացիները՝ թե՛ ռազմագերիները, թե՛ խաղաղ բնակիչները, ենթարկվում են համակարգված խոշտանգումների։ Այս մասին նշվում է The Guardian-ի և 12 այլ խոշոր արևմտյան ԶԼՄ-ների համատեղ հետաքննության մեջ։
Կես տարվա ընթացքում հավաքված ապացույցները վկայում են, որ խոշտանգումները կիրառվում են կեղծ խոստովանություններ կորզելու նպատակով, իսկ այդ համակարգը, ամենայն հավանականությամբ, ստեղծվել և վերահսկվում է Ռուսաստանի Դաշնության բարձրագույն ղեկավարության մասնակցությամբ։
The Guardian-ի տվյալներով՝ 18 խոշտանգման կենտրոն գտնվում է Ռուսաստանի տարածքում, ևս 11-ը՝ Ռուսաստանի կողմից Ուկրաինայի օկուպացված շրջաններում։ Ամենատարածված խոշտանգումների մեթոդներն են էլեկտրաշոկը, մահապատժի իմիտացիան, մուրճով ծեծը, մարմնի նույն հատվածներին կրկնակի հարվածելը, ինչպես նաև խեղդելը։
Ձերբակալվածներին ենթարկում են նվաստացումների․ նրանց կապում են սքոչով և օգտագործում որպես «կահույք»։ Բացի այդ, արգելվում է խոսել ուկրաիներեն, խստորեն սահմանափակվում է սնունդը, և բանտարկյալները ենթարկվում են հոգեբանական ճնշման՝ երբեմն դրդվելով ինքնասպանության։ Մի շարք հաստատություններում արձանագրվել են նաև մահվան դեպքեր։
