Ֆրանսիայի թվային մեդիայի նախարար Կլարա Շապպազը քննադատել է TikTok-ում տարածված #SkinnyTok միտումը՝ այն բնութագրելով որպես «զզվելի և բացարձակապես անընդունելի»։ Նրա խոսքով՝ այս միտումը խթանում է անորեքսիան՝ նպաստելով ամոթանքի, նվաստացման և հոգեբանական ճնշման տարածմանը, հատկապես՝ երիտասարդ աղջիկների ու կանանց շրջանում։
Նախարարը դիմել է Ֆրանսիայի աուդիովիզուալ և թվային հաղորդակցության վերահսկողության մարմնին (Arcom), ինչպես նաև Եվրամիության համապատասխան կառույցներին՝ հորդորելով ձեռնարկել համապատասխան միջոցներ։
«Այս տեսանյութերը, որոնք քարոզում են ծայրահեղ նիհարություն, զազրելի են և չեն կարող հանդուրժվել։ Թվային գործիքները կարող են խթանել առաջընթացն ու ազատությունը, սակայն դրանց ոչ պատշաճ օգտագործումը սպառնում է կյանքերին։ Սոցիալական հարթակներն այլևս չեն կարող խուսափել իրենց պատասխանատվությունից», – հայտարարել է Շապպազը։
#SkinnyTok հեշթեգով հրապարակված նյութերի թիվը TikTok-ում արդեն գերազանցում է կես միլիոնը։
