Հասարակություն
Փոստանջյանը տուգանվել է երեք երեխաների մոր կալանքի գործով նիստի ուղիղ եթերի համար
Փաստաբան Զարուհի Փոստանջյանը ֆեյսբուքյան իր էջում այսօր տեսանյութ էր հրապարակել, որտեղ երիտասարդ կինը, իմանալով կալանքի որոշման մասին, արտասվում է։ Փաստանջյանն ուղիղ եթերում նշել էր, որ կինն ունի 3 երեխա, որոնցից ամենափոքրը 8 ամսեկան է։ Փոստանջյանը նշել էր, որ նա հարցաքննվել է որպես վկա, այնուհետև դարձել է մեղադրյալ։ Նա կալանավորվել է խափանման միջոց բացակայելու արգելքը խախտելու համար և մեղադրվում է ապօրինի միգրացիային օժանդակելու գործով։
Մեկնաբանության համար Radar Armenia-ն դիմեց Քրեական դատարանների մամուլի խոսնակ Լիաննա Ռաֆայելյանին, որն էլ տեղեկացրեց․
«Զարուհի Փոստանջյանի կողմից ֆեյսբուքյան իր էջում հրապարակած երկու տեսագրությունների հարցով դիմել են դատարան, որին ի պատասխան հայտնել են, որ Փոստանջյանը հայցել է, բայց չի ստացել տեսանկարահանում և հեռարձակում կատարելու վերաբերյալ թույլտվություն։
Փոստանջյանը թաքցրել է հեռարձակման փաստը՝ նշելով, որ միայն ձայնագրում է հետագայում որպես պաշտպան օգտագործելու համար։ Այնուհետև դատավորը կազմի միջոցով պարզել է, որ Փոստանջյանն այդ պահին իր ֆեյսբուքյան էջով հեռարձակում է նիստը։ Դատավորը Փոստանջյանին տուգանել է 80.000 դրամով և արգելել հեռարձակումը։ Փոստանջյանը դադարեցրել է այն ժամանակավորապես և նիստի ավարտից անմիջապես հետո նորից առանց համապատասխան թույլտվության վերսկսել ուղիղ հեռարձակումը։ Ի դեպ, նիստի ավարտից հետո դատարանի տարածքում տեսանկարահանումն իրականացվում է միայն դատարանի նախագահի գրավոր թույլտվությամբ:
Ինչ վերաբերում է խափանման միջոցին, դատարանից հայտնեցին, որ ի սկզբանե մեղադրյալ Լ․ Հարությունյանը հրաժարվել է ներկայանալ դատական նիստերին, հրաժարվել է նաև հանրային պաշտպանից և չի ենթարկվել դատարանի կողմից բերման ենթարկելու որոշմանը, ինչպես նաև չի ենթարկվել իր նկատմամբ կիրառած տնային կալանքին»։
