«Ժողովուրդ» օրաթերթը գրում է.
«2018-ի հեղափոխությունից 7 տարի անց՝ Նիկոլ Փաշինյանի կառավարման ժամանակաշրջանում Հայաստանի Հանրապետության պետական պարտքը մարտի 31-ի դրությամբ կազմում է 5 տրլն 318 մլրդ դրամ։ Այս մասին երեկ իր ասուլիսում հայտնել էր Ֆինանսների նախարար Վահե Հովհաննիսյանը։ Ստացվում է, որ պետական պարտքը կազմել է մոտ 13.6 մլրդ դոլար։
Նա վստահեցրել է, որ պարտքի ներգրավումն ու ծավալները պլանավորված են ՀՀ բյուջեով, միջնաժամկետ պարտքի ռազմավարությամբ: Նախարարն ընդգծել է նաև, որ ընդհանուր պարտքի մեջ ներքին պարտքի մասնաբաժինն աճել է՝ հասնելով 50 տոկոս մակարդակի․ Հովհաննիսյանը սա բավականին լավ ցուցանիշ է համարել:
Հարկ է նշել, որ 2018 թվականի տարեվերջին Հայաստանի Հանրապետության պետական պարտքը կազմել է մոտ 6.9 միլիարդ դոլար: Պարտքային ցուցանիշները դրական համարող նախարարի մտքով անգամ չէր էլ անցնի, որ եթե համեմատենք 2018 թվականի պետական պարտքի տվյալները, ապա կարձանագրենք, որ պետական պարտքը 2018-ից մինչև 2025-ի մարտ աճել է մոտ 6.7 միլիարդ դոլարով, այսինքն՝ գրեթե կրկնապատկվել է։
ՀՆԱ-ի նկատմամբ պետական պարտքի հարաբերակցությունը ևս աճել է, բայց չափավոր՝ մոտ 2.5 տոկոսային կետով»։
