ԱՄՆ նախագահ Դոնալդ Թրամփը հայտարարել է, որ Coca-Cola ընկերությունը համաձայնել է ԱՄՆ շուկայում իր արտադրանքի համար օգտագործել եղեգնաշաքար՝ բարձր ֆրուկտոզ պարունակող եգիպտացորենի օշարակի փոխարեն։ Ըստ Թրամփի՝ այս որոշումը կայացվել է ընկերության հետ քննարկումների արդյունքում։
Coca-Cola-ն արդեն մի շարք երկրներում, այդ թվում՝ Մեքսիկայում, արտադրում է եղեգնաշաքարով քաղցրած ըմպելիք։ ԱՄՆ-ում որոշ խանութներում վաճառվում է այսպես կոչված «մեքսիկական Coca-Cola»-ն, որը պատրաստվում է հենց եղեգնաշաքարով։
Թեև պաշտոնական հաստատում դեռ չկա, Coca-Cola-ն հայտարարել է, որ շուտով կներկայացնի իր արտադրանքի նոր տարբերակների մանրամասները։ Նմանատիպ հայտարարությամբ հինգշաբթի օրը հանդես է եկել նաև PepsiCo-ն՝ նշելով, որ պատրաստ է անցնել շաքարի օգտագործման, եթե դրա պահանջարկը լինի սպառողների կողմից։
Միևնույն ժամանակ, փորձագետները զգուշացնում են, որ եգիպտացորենի օշարակի փոխարինումը եղեգնաշաքարով կարող է էապես բարդացնել մատակարարման շղթաները, պահանջել նոր պիտակավորում և, ամենակարևորը, բերել ծախսերի կտրուկ աճի։ Գնահատումներով՝ Coca-Cola-ի նման քայլը կարող է ավելացնել ընկերության ծախսերը ավելի քան 1 միլիարդ դոլարով։
Corn Refiners Association-ը հայտարարել է, որ եգիպտացորենի օշարակի ամբողջական դուրսբերումը կարող է նվազեցնել եգիպտացորենի գինը մինչև 0.34 դոլար մեկ բուշելի դիմաց և բերել ավելի քան 5 միլիարդ դոլարի կորուստ գյուղատնտեսական եկամուտներում։ Սա, իր հերթին, կարող է բացասաբար ազդել գյուղական շրջանների աշխատատեղերի վրա։
Ներկայումս հարցը դեռ քննարկման փուլում է։ Թեև առողջ ապրելակերպի կողմնակիցները ողջունում են հնարավոր փոփոխությունները, փորձագետները զգուշացնում են՝ դրանք կարող են լուրջ ազդեցություն ունենալ տնտեսության վրա։
